محتويات دورة أسرار الكلاسيك كنترول
السلام عليكم ورحمة الله وبركاته / معاكم
ابراهيم الخطيب مهندس كنترول ... أهلا بيكم في فيديو جديد من كورس " أسرار
الكلاسيك كنترول "، في درس انهارده هنتكلم عن محتويات الكورس ، ف يللا بينا
نبدأ:
في
الكورس بتاعنا مش هنشرح المكونات بشكل عشوائي زي ما بنشوف في معظم الكورسات ، حاولت
أخلي الموضوع منظم قدر الامكان علشان كده قسمت الكورس علي هيئة Chapters
كل شابتر منهم هيتكلم عن جزئية معينه مهمة معانا في الشغل :
الكورس متقسم لتسعة Chapters
: هنقولهم سريها :
1.
أول تشابتر هيكون عن النظريات الخاصه بالتحكم الألي.
2.
الفصل التاني هيكون عن كل العناصر والمكونات المختلفة المستخدمة في
الكلاسيك كنترول.
3.
الفصل التالت هيكون عن حساب الCurrent وازاي أختار المكونات.
4.
الفصل الرابع هيكون عن الأحمال الكهربية بأنواعها.
5.
الفصل الخامس هيتكلم عن أجهزة القياس والحساسات.
6.
الفصل السادس هناخد مع بعض أمثلة عملية علي تطبيقات مختلفة نقدر نعملها
بالكلاسيك كنترول.
7.
تشابتر سبعه هنتكلم عن طرق بدء الحركة بالنسبة للمواتير الكهربية.
8.
الفصل التامن هنتكلم عن مشروع متكامل وهنغطي كل التفاصيل الخاصة بتنفيذ
المشاريع.
9.
أخر فصل معانا هنتكلم عن أفضل المراجع في مجال الكلاسيك كنترول ، وهنقول
الخطوات اللي جاية نعمل ايه بعد كده.
كده احنا قلنا المحتويات باختصار لو وصلت
لهنا تمام ، تقدر تقفل الفيديو وتستني الفيديو اللي جاي ان شاء الله ، ولو عاوز
تعرف تفاصيل أكتر كمل معايا للأخر :
هنفتح ملف المحتويات ونشوف كل التفاصيل مع
بعض:
زي ما احنا شايفين دي التفاصيل الكاملة لكل
الحلقات اللي هتنزل ان شاء الله ، عاوزين نثبت قاعدة كده:
"ان الكورس ده أول Level
عاوزين نخرج منه بأكبر قدر من المعلومات بسرعه
، علشان كده مش هنتعمق في التفاصيل النظرية وكل أنواع المكونات اللي موجوده
في الدنيا ، احنا هناخد الأشهر من كل حاجه ، يعني هنغطي الجزء اللي هيخلينا نقدر
ننفذ 80% من المشاريع ".... اتفقنا ؟
نكمل ...
1.
تشابتر واحد مكون من محاضرتين هما
: مفهوم الكنترول سيستم ، وأنواع الكنترول سيستمز ... هنعرف الفرق بين
المهندس اللي فاهم كنترول واللي مش فاهم.
2.
تشابتر اتنين هو الأكبر معانا وزي ما انتوا شايفين متقسم علي أربع اجزاء:
الجزء الأول هيتكلم عن انواع الجهود المختلفه
اللي هتقابلك في المصانع.
الجزء التاني هيكون عن الحماية الكهربية هيبدأ بشرح يعني ايه Electrical Fault بعدين ناخد اجهزة الحماية زي السيركت بريكر والافرلود والفيوز.
الجزء التالت هيتكلم عن العناصر اللي بعمل
بيها كنترول علي الاحمال زي الكونتاكتور والريلاي والسوليد ستيت والتايمر
والكاونتر.
الجزء الرابع هيتكلم عن عناصر التشغيل
والايقاف زي البوش بوتن والسليكتور ومفاتيح الطواريء ولمبات البيان.
الجزء الخامس هيتكلم عن الكابلات والأسلاك
... وبكده نكون خلصنا تشابتر 2 ، ونكمل في اللي بعد كده ...
3.
تالت تشابتر هيكون عن حسابات الأمبير واللي بناءً عليها هعمل Sizing
للمكونات وابدأ اشتري بناءً علي كده.
4.
رابع تشابتر هيتكلم عن الأحمال الكهربية سواء الأحمال دي كانت Resistive loads زي السخانات أو Capacitive loads زي الcapacitor banks وازاي بستخدمها لتحسين الباور فاكتور ، بعد كده هنتكلم عن الinductive loads زي المواتير .. بعد كده
هناخد فكرة عن احمال النيوماتيك والهيدروليك لأنها هتقابلنا كتير زي ما اتفقنا
القاعدة اننا نتكلم عن الحاجات اللي هتقابلنا في كل المصانع تقريياً
5.
خامس فصل معانا هنتكلم فيه عن اجهزة القياس زي الافوميتر وكلامب الأمبير
وبعدين هناخد الحساسات الأشهر في كل التطبيقات.
6.
الفصل السادس هنكون أتأهلنا اننا ناخد تسع مشاريع صغيرة لسه بختار المشاريع
دي حالياً علشان عاوز أختار حاجات عملية أكون نفذتها في مشاريع حقيقية.
7.
الفصل السابع هنتكلم عن طرق بدء الحركة هنشرح الDirect Online
بعدين ستار دلتا ، بعدين السوفت ستارتر والانفرتر ... امتا استخدم كل طريقة من دول
وازاي ننفذها.
8.
الفصل التامن هو الأهم من وجهة نظري هيكون عبارة عن مشروع متكامل هنتكلم
فيه عن ازاي تخطط اللوحة بتاعتك وتختارها كام في كام وازاي تحط المكونات علي
المراية وايه العدد اليدوية اللي انا بحتاجها علشان أنفذ لوحة بعدين هناخد ازاي
تختبر اللوحة دي في الورشة عندك ثم بعد كده تروح تركبها في الموقع وتختبرها عند
العميل وانتا واثق انها ان شاء الله تشتغل تمام.
بعد كده هناخد مشروع أكبر شوية ونشوف ازاي
نرسم دائرة الباور ودائرة الكنترول ونعمله سيميوليشن مع بعض ونقول عيوب
السيميوليشن وخلي بالك دي حاجه محدش هيقولهالك لأن في الكلاسيك بالذات مش معني ان
الدائرة اشتغلت سيميوليشن يبقي هتشتغل في الحقيقة فيه شوية تريكات كده لازم تاخد
بالك منها علشان بنسبة كبيرة تضمن ان الدائرة تشتغل معاك من غير مشاكل باذن الله.
9.
في الفصل التاسع والأخير هقولك انتا وصلت لفين في الأتوميشن وتقدر تشتغل
ايه ؟ ولو هتروح شركة تقدم علي شغل أو
تدريب هتقولهم بعرف أعمل ايه ؟
بعد كده هرشحلك مجموعة مراجع تحاول تخليها
معاك هارد كوبي المراجع دي هتبقي معاك
علشان تدور علي اي معلومة في مجال الكلاسيك كنترول لما تحتاجها ... آخر درس ان شاء
الله هنحدد ايه الخطوات الجايه ونرشح بعض المصادر نكمل منها طريقنا علشان نبقي
مهندسين أتوميشن أو مهندسين صيانه شاطرين باذن الله.
-------------------------------------------------------------------------------------------------------------------------------
كده درس انهارده خلص ، ما تنسونيش في الدعاء
،
اعملوا لايك وشير واشتركوا في القناه ، واللي
عنده اسئلة يسيبها في التعليقات أو علي جروب الفيسبوك ، كل الروابط هتلاقوها في ال
description/ أول تعليق.
اشوفكم علي خير في الحلقة الجايه .... والسلام
عليكم ورحمة الله وبركاته.
